Histori e shkurtër
Nga pak njerëz në dy qytete, te tridhjetë kisha.
Një përmbledhje e shkurtër historike e Kishës Ungjillore në Maqedoni.
Takimet e para
Fillimet e Kishës Ungjillore në Maqedoni datojnë nga vitet tetëdhjetë të shekullit të kaluar, kur në qytetet Shkup dhe Shtip u shfaqën disa njerëz të cilët, në kontekste të ndryshme, duke dëgjuar mesazhin e Ungjillit, besuan te Jezusi dhe filluan të mblidheshin në takime joformale. Diku në vitin 1988, ndërsa Republika e Maqedonisë ishte ende pjesë e RSF të Jugosllavisë, dy çifte misionarësh nga Serbia erdhën në Shkup dhe Shtip për t’u ndihmuar atyre grupeve të vogla besimtarësh ekzistuese, dhe me këtë nisën edhe shërbesat zyrtare dhe regjistrimet e atyre bashkësive në kuadër të Kishës Pentekostale të Krishtit në Jugosllavi. Udhëheqës të kishës së Shkupit u bënë Dimitrije dhe Cveta Papadiq, ndërsa udhëheqës të kishës së Shtipit Budimir dhe Asteria Jakiq.
Objekte të vetat dhe një emër i ri
Në vitin 1991, kishat në Shkup dhe Shtip blenë edhe shtëpi, të cilat me përshtatje filluan të përdoreshin si objekte kishtare, dhe atëherë ndodhi edhe ndryshimi i emrit zyrtar të kishës, me emrin Kisha Ungjillore në Republikën e Maqedonisë, me seli në Shkup, në rrugën Franklin Ruzvelt nr. 16.
Përgatitja e udhëheqësve të rinj
Strategjia e udhëheqësve të kishës ishte që besimtarët e rinj dhe çiftet e reja të dërgoheshin në studime teologjike, më së shpeshti në Fakultetin Teologjik Ungjillor në Osijek, Kroaci, ose në fakultete të tjera në Serbi, Bullgari, Angli, Kanada dhe vende të tjera, për të përgatitur udhëheqës të rinj të kishave në Maqedoni. Pas largimit të Dimitrijes dhe Cveta Papadiqit, shpejt më pas, në vitin 1994, rolin pastoral të Kishës Ungjillore në Shkup e mori Mirço Andreev, i cili u bë edhe kryetar i Kishës Ungjillore në Republikën e Maqedonisë.
Mbi tridhjetë kisha të reja
Në tridhjetë vitet vijuese të Maqedonisë së pavarur u themeluan mbi tridhjetë kisha dhe stacione misionare të reja ungjillore anembanë vendit. Shumica e atyre kishave sot kanë pastorë të shuguruar, të cilët kanë përfunduar arsimin përkatës teologjik.
Udhëheqja e sotme
Në vitin 2020 ndërroi jetë Mirço Andreev, pas së cilës për kryetar të ri të Kishës Ungjillore u zgjodh Petre Petrov, pastor i Kishës Ungjillore në Shtip, ndërsa me statutin e ri dhe me ndryshimin e emrit të shtetit, emri i ri zyrtar u bë Kisha Ungjillore në Maqedoni. Organi kryesor vendimmarrës i denominacionit është Këshilli i Pastorëve. Denominacioni ka edhe Ekipin e vet Ekzekutiv dhe nënkryetarin.
Çfarë ka bërë kisha ndër vite
Gjatë të gjitha viteve të ekzistencës së Kishës Ungjillore në Maqedoni, kisha ka qenë aktive në themelimin e kishave të reja, në blerjen ose ndërtimin e objekteve të reja kishtare, në botimin e literaturës së krishterë, në ngjarje të ndryshme ungjillëzimi, mësimdhënieje, tribuna, debate, koncerte, konferenca, seminare, kampe, si dhe takime për fëmijë, të rinj, gra dhe burra, programe për çlirimin e të varurve, etj.
Një aspekt jashtëzakonisht i rëndësishëm në veprimtarinë e Kishës Ungjillore kanë qenë aktivitetet humanitare të organizatës humanitare AGAPE dhe shumë aksione e projekte të tjera individuale humanitare. Kisha Ungjillore sot ka në radhët e veta doktorë, magjistra dhe teologë të diplomuar, burra dhe gra, të përfshirë në veprimtaritë e ndryshme të kishës, si dhe ka fakultetin e vet teologjik ETIK – Instituti Teologjik Ungjillor Kumanovë, për përgatitjen teologjike të kuadrove të reja. Kishat ungjillore në qytete të ndryshme nëpër Maqedoni udhëhiqen nga njerëz vendas nga Maqedonia, por Kisha Ungjillore gjithmonë ka kultivuar edhe lidhje e bashkëpunim të frytshëm ndërdenominacional dhe ndërkombëtar, në nivel partneriteti, me kisha e organizata të ndryshme të krishtera nga vendi dhe nga jashtë.