Продолжена рака на Божјата љубов.

Хуманитарна организација „АГАПЕ“

Во рамките на Евангелска црква е регистрирана и хуманитарната организација „АГАПЕ“, со задача да ја спроведува хуманитарната и добротворната дејност на Е.Ц. во Македонија. Тоа вклучува помош на беспомошни лица без оглед на националната, верската и половата припадност.

„Агапе“ помага на прогонети, осамени и напуштени деца, на духовно обременети и на сите останати на кои им е потребно да се понесат нивните духовни или телесни грижи и да им се понуди соодветна помош.

Својата дејност АГАПЕ ја вршеше најзасилено за време на косовската криза и годините потоа, но и денес служи како алатка за хуманитарни проекти и за помагање на социјално загрозени семејства.

Хуманитарен центар за алишта

Во рамките на Евангелска црква — Неготино функционира хуманитарен центар за алишта, преку кој им се помага на социјално загрозени семејства.

Центарот започна со работа на 5 април 2022 и е сместен во општествена зграда, позната како поранешното ФЗО. Алиштата и чевлите ги добиваме од луѓе и организации што ни ги донираат; најчесто се половни, но добро зачувани, и бесплатно ги делиме на луѓе во потреба.

Просториите се отворени два дена во неделата и со нив раководат волонтери.

Донирај или прашај Росанда Спасова-Цаца · 075 450 372

Милосрдна дејност

Милосрдната дејност на Евангелска Црква во Велес трае од 2017 година. Започната е скромно, но по Божја благодат расте од година во година. Дејноста ја гледаме како продолжена рака на Божјата љубов за сите луѓе, без разлика на нивната позадина и статус.

Опфаќа секојдневни и месечни активности, како и поединечни проекти:

• пакети храна за социјално загрозени семејства — над 70 семејства секој месец
• поддршка и помош за Народната кујна — 20 топли оброци секој ден
• стипендирање студенти од социјално загрозени семејства
• стипендирање курс по ИТ технологии за средношколци
• парични донации за операции, лекување и терапии за деца и возрасни
• реновирање домови, самостојно и во соработка со други организации
• две изградени и опремени сензорни соби за деца со аутизам, во П.О.У. „Маца Овчарова“ и О.У. „Васил Главинов“ — Велес
• мебел, материјали и прибор за Развојното советувалиште при Здравствениот дом — Велес
• комплетна постелнина, перници, покривачи, пелени и алишта за Детското одделение и Неонатологијата при Општата болница — Велес
• донација за болницата во Јасеново
• неколку илјади медицински маски и стотици визири за Здравствениот дом, болницата и полицијата во Велес
• плаќање заостанати сметки за социјално загрозени семејства
• обезбедување огрев за социјално загрозени лица
• училишен прибор за деца од социјално загрозени семејства на почетокот на учебната година
• континуирана соработка и поддршка на Здружението на лица со церебрална парализа — Велес: храна, финансии, изградба на пристапна рампа и слично
• стотици божиќни пакетчиња за деца, секоја година
• алишта, пелени, козметика и храна за новороденчиња од социјално загрозени и многудетни семејства
• индивидуални акции за поделба на стотици топли оброци на луѓе во потреба
• организирање летни кампови за деца со попреченост и нивните семејства